Psa 47 | KYC | STEP | Wambu peparae rae maiyuo kingi kape pyalapape. Kenane keyange lapo poraiyuo pyao dokome Anatu lakandalapape.

Psalms 47

Kiŋi Kamongope Dusipana Ketaele Ingyuo Karenge Doko

1 Wambu peparae rae maiyuo kingi kape pyalapape.
Kenane keyange lapo poraiyuo pyao dokome Anatu lakandalapape.
2 Kamongo Ama Ketae doko baa andake lao suu pyao pako kararami.
Baa iki kiŋi andake ingyuo karenge dokome yuu muu dupwa peparaena iso karenge.
3 Baame wambu peparae nyuo isa palyakao
yuu liti peparae iso kararami lao pyakaya.
4 Namwa yuu palamano doko baame palirami lao nyuo jiya.
Wambu baame mona reteyamo dupwa yuu dokonyuo palipala kimbu pisipyamo karamano lao suu pilyaminyi.

5 Anatu banya kiŋinya petenge isa pao nyilyamo.
Nyipyamo dokopa wambu dupwa mona pyakalyuo pipyasa pii porakai lao bikuli dupwa pyao karaminyi.
6 Anatu lakando kenane pyamana.
Namwana kiŋidoko lakandamana.
7 Anatu baa kiŋi doko yuu muu dupwapeparaena iso karamo dokona
kenane pyao lakandamana.

8 Anatu banya kiŋinya petenge isa poo pyasi dokona pisapala
baame wambu dupwa iso karamo.
9 Wambu iso karenge akali dupwa pipya
Aporakamena Anatu dokona wambu dupwa role pyao karaminyi.
Baame ami yanda singinya porai renge dupwa manda manja nange.
Baa keta porainyarenge palipala kiŋi dupwana ketaele ingyuo iso karenge.